Gen 22 | NdeIBE | STEP | Ngesinye isikhathi ngemva kwalokho uNkulunkulu walinga u-Abhrahama. Wathi kuye, “Abhrahama!” Waphendula wathi, “Ngilapha.”

Genesis 22

Ukulingwa kuka-Abhrahama

1 Ngesinye isikhathi ngemva kwalokho uNkulunkulu walinga u-Abhrahama. Wathi kuye, “Abhrahama!” Waphendula wathi, “Ngilapha.”

2 UNkulunkulu wasesithi, “Thatha indodana yakho, indodana yakho eyiyo yodwa, u-Isaka, omthandayo, uye emmangweni waseMoriya. Khonapho menze umhlatshelo abe ngumnikelo wokutshiswa phezu kwenye yezintaba engizakutshela yona.”

3 Ngakusasa ekuseni kakhulu u-Abhrahama wavuka wabopha ubabhemi wakhe. Wahamba lezinceku zakhe ezimbili kanye lendodana yakhe u-Isaka. Kwathi esegamule izinkuni ezaneleyo ezomnikelo wokutshiswa, waqhubeka waya kuleyondawo uNkulunkulu ayemtshele yona. 4 Ngelanga lesithathu u-Abhrahama wakhangela, wayibona leyondawo kude le. 5 Wathi ezincekwini zakhe, “Hlalani lapha lobabhemi, mina lomfana sisake siye laphayana. Sizakuthi singakhonza sibuye kini.”

6 U-Abhrahama wathatha izinkuni zomnikelo wokutshiswa wazetshatha umntanakhe u-Isaka, yena ngokwakhe waphatha umlilo lengqamu. Kwathi belokhu beqhubeka bobabili, 7 u-Isaka wakhuluma wambuza uyise u-Abhrahama wathi, “Baba?” “Yebo, ndodana yami?” kusabela u-Abhrahama. “Umlilo lenkuni nanku kukhona,” kusitsho u-Isaka, “kodwa kanti lingaphi izinyane lomnikelo wokutshiswa?”

8 U-Abhrahama waphendula wathi, “Ndodana yami, uNkulunkulu ngokwakhe uzasipha izinyane lomnikelo wokutshiswa.” Baqhubeka bobabili bahamba.

9 Sebefikile endaweni uNkulunkulu amtshela yona, u-Abhrahama wakha i-alithare khonapho walungisa izinkuni phezu kwalo. Wabopha indodana yakhe u-Isaka wayilalisa e-alithareni phezu kwezinkuni. 10 Yikho waseselula isandla sakhe ethatha ingqamu ukuba abulale indodana yakhe. 11 Kodwa ingilosi kaJehova yammemeza isezulwini yathi, “Abhrahama! Abhrahama!” Waphendula wathi, “Ngilapha.”

12 Yathi, “Ungamthinti ngesandla sakho umfana. Ungenzi lutho kuye. Khathesi sengisazi ukuthi uyamesaba uNkulunkulu, ngokuba kawuyigodlanga indodana yakho eyiyo yodwa.”

13 U-Abhrahama wathi uyakhangela wabona nansiya inqama esixukwini igaxele ngezimpondo zayo. Waya khona wayithatha inqama wayenza umhlatshelo womnikelo wokutshiswa esikhundleni sendodana yakhe.

14 Yikho u-Abhrahama wabiza indawo leyo ngokuthi UJehova Uzanakekela. Kuze kube lamuhla kuthiwa, “Entabeni kaJehova kuzanakekelwa.”

15 Ingilosi kaJehova yabiza u-Abhrahama isezulwini ngokwesibili 16 yathi, “Ngifunga ngami ngokwami,” kutsho uJehova, “ukuthi ngenxa yokuthi ukwenzile lokhu, kawaze wayigodla indodana yakho eyiyo yodwa,

17 ngempela ngizakubusisa ngenze izizukulwane zakho zibe zinengi njengezinkanyezi emkhathini lanjengetshebetshebe ogwini lolwandle. Izizukulwane zakho zizawathatha amadolobho ezitha zazo, 18 kuthi ngenzalo yakho zonke izizwe zomhlaba zizabusiswa, ngokuba ungilalele.”

19 Yikho u-Abhrahama wasebuyela ezincekwini zakhe, basebehamba bonke eBherisheba. U-Abhrahama wahlala eBherisheba.

Amadodana kaNahori

20 Ngesinye isikhathi samuva u-Abhrahama watshelwa kwathiwa, “UMilikha laye uselabantwana; sewazalela umfowenu uNahori amadodana: 21 u-Uzi izibulo, loBhuzi umfowabo, loKhemuyeli (uyise ka-Aramu), 22 loKhesedi, loHazo, loPhilidashi, loJidilafu loBhethuweli.”

23 UBhethuweli wazala uRabheka. UMilikha wazala amadodana la aficamibili loNahori umfowabo ka-Abhrahama. 24 Umkakhe waseceleni owayethiwa nguRehuma laye wayelamadodana: uThebha, loGahami, loThahashi kanye loMahakha.